11月30日

一言驚醒夢中人

人地讀緊書o架
唔好成日煩住人地阻住人地啦
人地要專心讀書o架

la dolce fuji instax mini

我發覺
我真係唔應該成日講佢
其實對佢. . . 都冇乜嘢好講
都冇新嘢發生
人地都唔想聽
覺得自己很煩

但又真係仆街
佢的確係住左我個心度. . . .
每一刻都會諗起佢
邱曉筠食屎大的

11月29日

返十點係一個折磨
彷彿從未試過咁攰
有點想破口鬧佢
一個咁簡單嘅拍子，我講咁多次你都可以錯
唉，但話到底佢都係一個乖嘅小朋友
只係冇乜練嘢jeh. . .

十二點深井
今朝出門仲落雨，但又好似變到好好天喇，太陽仲熱辣辣
小妹妹行近窗邊，「好熱呀﹗好熱呀﹗」
有冇咁誇張，都唔係熱到要即刻彈開啩？ =]
深井很熱嗎？佢地著緊短袖衫同超短褲
可能因為有學跆拳道？所以啲肉結實啲？
望住佢有點點肥的小大脾，坐喺度都唔會變一pac仲脹卜卜好挺
嘩，好得意呀﹗

一邊搭車一邊轉車一邊瞓到隻豬咁去堅尼地城
上佢堂真輕鬆，因為我唔講嘢佢都會係咁撩我講嘢
我有嘢好想講時佢又會同我講，哈 XD
上完佢，就返屋企喇，唔駛上置富喇
我問左佢點解唔學，佢話因為多功課又冇時間練，所以唔學住喇，唔係因為我嘅問題
呼~ 其實，我都知道唔會係因為我嘅問題，但，得個知字嘛，我八卦

特意地，去左旺角走了一轉
「全城期待　限量發售」
「少量現貨　限量發售」
去左兩間永成，就係見到佢地寫左呢兩句說話黐左喺史迪仔即影即有菲林附近
我終於買到史迪仔即影即有菲林喇，係尋日新返o架
$68盒，買左兩盒，不過買左都好似唔識開心. . .
只係send左個彷彿好開心的sms畀兩個人

佢啲叮噹即影即有竟然賣晒. . .
我而家有啲想試叮噹. . .

仲去左信和穿兜左個圈搵史迪仔
原和信和已經變成格仔鋪世界，精品天地
我幾耐冇黎行. . . 上一次黎唔會就係6月23號呀嘛？
我喺2樓都見到史迪仔菲林，但賣成$80喎，叮噹亦是。

極度眼瞓以致心情唔多好
我諗係咁
感覺到個黑眼圈好黑，係感覺到
好黑，真係好黑，對眼好攰
好似好耐冇試過咁攰咁攰. . .
諗起嗰日細佬佢地唱起黑眼圈. . . 「談戀愛就變得極難進睡」
佢地話我，我都冇拍拖，點解都係咁夜瞓. . .
BOO! 勁可惡﹗
就當我同部電腦拍拖啦. . .

不過，當我邊睇大結局邊影佢地時，心情好似好返啲咁啦. . .
有點期待快啲開黎影. . .
但，我可以同邊個影先影得晒呢


同我喺大方買嘅唔同，永成買嘅有米老鼠防偽貼紙，仲寫住HongKomg添
同埋後面有黐返中文的注意事項
上次有人同我講，佢之前影左三盒，每盒都有啲唔同，即係唔只得十款菲林
搞到我心郁郁想去唔同地方買，因為我覺得批次唔同. . . 入面唔同機會大啲
睇返我之前買嘅4盒，頭兩盒次序一樣嘅都係同批次，之後兩盒次序唔同嘅係唔同批次
好想快啲影晒今次呢4盒，想睇下會唔會唔同. . .

我與久違了的人傾了一個鐘頭電話
搞到，搞到我個大結局冇睇晒. . .
講一個電話，知道好多嘢
知道人地蘇淅原來有邵美君幫手搞劇社，難怪人地出黎啲學生咁勁(咁你都要努力啲啦!)
仲知道
知道有人仲介意當年musical畀人話佢冇執戲
知道有人仲介意某啲同學唔能夠釋懷
知道有人仲介意某啲同學唔鍾意自己
是的，唔鍾意一個人大概唔只因為一個人，仲係因為一個團體
其實我仲好想講. . . 佢地唔鍾意你可能係因為. . . 我太撐你 =P
其實我而家好忙，我要撐周生o架囉
得閒先撐下人地啦，而家人地有大把學生fans，我呢啲小角色黎o架jeh
然後仲知道，人地個BB仔好曵曵，好危險，我會為佢而祈禱. . . (竟然係仔呀!!!)

慶幸的是，我還能與你傾一個鐘頭電話
一定要幫我祈禱. . .
因為我真係好想. . 有生之年仲可以有機會同佢傾一個鐘頭電話. . . .

其實我係真係好想有多啲機會返培英. . .
(其中一個原因就係要話畀某啲人知，我好鍾意某啲老師，就係唔鍾意你! XD)

如果可以畀我再企喺嗰個台唱首歌
幾咁好. .
亦都係好恐怖
可能會畀當年比賽時更驚. .

喂﹗
下個禮拜日夜晚09:30明珠台做〈阿森一族大電影〉
07年的暑假我入戲院睇左一次
下個禮拜日晚留喺屋企一齊睇丫
=]

有冇人願意聽都好，我真係好想高歌〈地下街〉呀～﹗

11月28日

好耐冇試過咁辛苦
最後，琴日共屙左. . . 五次定六次

然後今日
一早返左陣琴行，小小時間返左屋企

我就知道，十一點. . . 所以我返左去

然後又出門前，我坐喺廁所喺度諗. . .
「到底返唔返去好？」

最後都返左
可是我上左兩個就頂唔順走左喇. . .
今日屙左兩次jeh，但個胃勁唔舒服
都唔知做乜. . . 以為尋日屙完今日就冇事啦
唔係前晚一個唔熟的蛋黃就搞到我咁呀嘛!?
返左屋企眠左眠，抖一抖，再黎下一場
較好晒鬧鐘啦，醒左醒o架，但，我發夢見到某人就唔願醒喇
瞓過左龍
朝早仲捱到唔搭的士，但呢次真係唔可以唔搭. . . 唉 >.<

仲諗住，今日有啲時間可以去一去啟新書院開放日
又開放日喇. . . 我一定記得兩年前開放日係12月1號，同金小姐去左
因為前一晚去左打邊爐我諗起一首歌，然後嗰日我聽到隊band唱漢城沉沒了
咁又兩年喇，恐唔恐怖，又要唱返句. . . 沉在愉快時日越走越快 >.<

好辛苦咁喺第一城捱左個半鐘
人地好心急想快啲去麥當勞食開心樂園餐換小丸子，同埋我成日都未食嘢囉
竟然撞到八婆仔Karen Chan第一日喺度返工﹗
不過﹗我最想換嗰隻青色星星小丸子竟然售罄﹗有冇咁快呀？尋日先開始咋喎﹗
勁可惡﹗即刻勁心急要飛去第2度. . .
搭804返顯徑嗰間睇下冇，點知等十世都冇車，忍唔住上左80K
唔sure新翠有冇麥當勞. . . 不過好似有呀嘛. . . 是但啦﹗上左車先算﹗
點知，我唔記得佢原來經禾輋，然後我今日就竟然係返左黎禾輋
終於畀我換到﹗
青色星星，好燦爛
又唔知點解，我真係驚周圍都換晒佢我會換唔到
我唔要其他，我只要佢一個。
你想唔想像到我得到佢之後，係點樣低能地拎住部相機笑住同佢影相
明明部機就唔係影我囉。

我頭先上堂仲同個學生講起dolce呢個字
「有間雪糕店個名有dolce呢個字，你諗下雪糕係咩味嘅？
　一間叫媽咪帶你去禾輋食雪糕，食完你就會記得個字點解」
點知黎禾輋嗰個係我
有機會我都想試下佢啲雪糕，睇下係咪真係咁dolce. . .

再搭88K返顯徑，上埋最後一個，拖返我條屍返屋企喇. . .

雖然屙左兩次都冇再屙，但都係乖啲食碗粥啦. . . 我都久違了皮蛋瘦喇，好味。

原來，我醒唔起. .

我將兩件事分開左黎諗

我記得某人生日

我記得某人生日

我諗緊送咩生日禮物畀人地好

但其實，一直都唔關另一個某人事囉

唔好誤會

我竟然今日先諗到，失敗左。

禾輋的美好回憶
街市的十蚊車仔麵 (全世界最好食的車仔麵)
街市麵包鋪的五蚊份大大份三文治 (我通常要食兩份)
街市麵包鋪的大大粒勁多粉小丸子
金禾的快餐黑椒雞扒飯/意粉 (又彷彿係全世界最好食的黑椒雞扒)
陶宛的雲吞麵
陶宛的皮蛋瘦肉粥
食樂美的十三蚊連汽水外賣飯盒
波記的沙嗲牛肉公仔麵

還有最後兩年的你和你。

11月27日

起身到出門前就已經屙左4次
真係想死，好痛 >.<

返一返顯徑就屋企

便來心情真係唔係話太好
唔知係小腹痛定係攬肚痛定係胃痛
又唔知係因為乜，總之唔多好

不過多得人地的sms
低能，但都足以令我心情好轉，展笑顏

哈哈
人地剪左頭髮都話我知，我的線人對我真係好
最緊要係好唔好睇，靚唔靚仔
連人地搭咩車都話埋我知，會唔會好得滯
但如果我的線人可以偷影埋人地畀我睇就最好喇 XD

我都要剪頭髮呀
點解我講左十世但都未擇到個吉日去剪走啲煩惱絲o架
我而家好煩惱呀﹗

出左出德福
我畀錢拎貨咋嘛. . . 點解都要搞成半個鐘？
好嘢﹗白色入面全件抓毛的外套，你係我o架喇﹗
件灰色望落去真係好靚o架﹗試件灰色時，唔係sell緊我的姐姐都讚我著得好睇呀﹗
但一試白色，佢都忍唔住話白色襯我多啲喇﹗
仲有頂紅色冷帽，都係我o架喇﹗睇落好似好細頂，但戴上我頭仍然有點大
我好少買帽o架. . . 就算可能我好想買一頂，但我都要遇到真係超啱心水先肯買
對死物我都好似對人咁認真o架﹗
仲有件紅卜卜毛毛蝙蝠，應該星期三就有得去沙田拎. . . 到時佢又係我o架喇
有姐姐讚我個身型著衫好睇，呵，咁我又唔會買多啲喎，我有自知之名，不嬲都好睇o架啦﹗
我生得細粒都係好事丫，好多衫睇落都好靚，但試上身都太大，可以買少啲，個天對我真好 =P

去葵芳
去左葵涌廣場2/F同阿強搵格仔鋪搵史迪仔即影即有菲林. . .
搵左好多間，都見唔到. . .
阿強很好喇，幫我去永成問過，話下個禮拜會返貨. . .
唉，唔知喇. . . 突然講到啲史迪仔菲林，我有點頹. . .

其實開始有點想放棄. .
因為我已經有兩盒喇. . .
好啦，畀我搵到好多盒買到好多盒，咁又點？
始終有一日都係會影完o架啦﹗
始終有一日都係會影晒o架啦﹗
始終有一日都係會唔出o架啦﹗
畀我有好多盒好多張，咁我又可以同邊個影呢？
. . . . .

開心時刻Pizza Hut﹗

好不容易食住個前菜沙律飲住湯等Ceci黎先開始食佢. . .
大蝦沙律星芝批
我終於第二次食到你喇﹗

(其實影相都係dum時間等Ceci放工囉)

同佢講pizza到，佢又真係好快飛到黎囉﹗XD

好醜樣呀你 XDDD

勁好味﹗
真係勁好味囉﹗
批邊芝士勁好味﹗
批邊肉腸勁好味﹗
大蝦好味﹗
沙律醬. . . 好似冇我上次食嗰個咁勁沙律醬味囉
但成個批都係勁好味﹗

點解個檸茶咁靚o架呢

二人餐，一個大批，兩個飲品，兩個湯，一個前菜
兩粒批邊為一件，共有八件，三個人食都飽到傻左
好在之後催佢個吞拿魚雞肉烤卷原來冇落單，唔要lu~ 好夠好滿足喇~
加埋一都係$229.9咋﹗係咪好抵好開心時刻先﹗
喂喂﹗呢個大蝦沙律星芝批出到12月9號咋﹗要食快啲食喇﹗
之後會有另一個口味嘅星芝批推出喇. . .

戀愛總是平靜地意外身亡

係我第一次去葵青劇院演奏廳睇drama
嘩，原來個場咁大，坐落去，感覺都幾似apa
我揀得位真係幾靚o架﹗
不過較遲入場仲要坐偏中間. . . 就真係麻煩左啲嘅 =P

咁多個track，我比較喜歡呢個track...個名

　　戀愛總是平靜地意外發生

晚晚失眠
每朝起身覺得好寂寞
甜蜜嘅回憶就好似較左鬧鐘咁，好準時就會LAAAAAAAAAAAARN~~~

這個形容得好好
這種咁痛苦嘅日子，我希望以後都唔會再發生喺自己身上
我唔要再有呢種經歷，可以嘛？

嘻，我好醒
一睇到佢抽到m巾嗰個愕然樣，我就估佢有左喇. . . XD

兩位新人都好睇
那個叫Eric的楊政楠，總覺得佢個樣好熟口面. . . 好似喺tvb啲電視劇見過咁
黃呈欣都好睇，有把靚聲做戲都真係吸引啲
(search完先知，原來係沙田蘇淅舊生，一校之隔，點解人地咁勁，我地咁渣)
但兩個都好似彷彿有一點點唔自然
唏~ 今場第一場咋，很好啦

成套嘢，真係好似Rent
又講一堆朋友又講同性戀又講一堆窮人
臨尾又好似佢地一齊唱525600 Minutes
真係好似
然後，講起Rent我就諗起2月嗰時的musical workshop嗰個女人. . .
哎，我諗極都諗唔起佢個名，但今晚真係畀我見到佢，真邪

好睇
笑位笑到肚痛
扮清潔香港運動同防止騙案宣傳片，笑到死鬼左
不過有點覺得，同個故仔好似冇乜關係，用左太多時間咁
但又想不到，唱Hey Jude的時候
我跟他一起哭了. . . 這竟成為了我的喊位
覺上半場好睇過下半場，冇諗住畀佢牽動到我情緒o架嘛. . .
其實，唔太完全知道Hey Jude的歌詞，但音樂就係咁神奇，係用melody去打動你. . .
不過，我睇到阿Jude又攣變直. . . 真係唔多接受到，因為佢攣嘅形象太深入我心

其實好多嘢想講，不過好攰喇，組織唔到
最後一點係，好似〈一期一會〉又係最尾有個死人行過大家望住佢唱首歌

見到Fi，佢個頭真係好純情，亦都好. . . 村姑 =P
Carmen瘦得恐怖 >.<

*睇到好嘢，我都好想同住左喺我"呢度"嘅嗰位分享呀. . =]

學生打黎聽唔到，估唔到睇到個sms就係. . . 暫停學笛
唔緊要，一雞死一雞嗚

我真係好想送生日禮物畀人
如果我諗到送咩的話我好想送
但如果諗唔到送咩的話，唔會夾硬搵嘢送

仲有時間，可以再諗下. . .

所有嘅感覺都同佢有關
因為呢個人已經住左喺你「呢度」。

11月26日

瞓前
我學緊結他的細佬，睇緊本個fd借畀佢嘅書
佢睇住本書問我，咩係「全分音」「二分音」「四分音」
我就黎收佢學費o架喇，咁蠢講十世都唔明
計數咋嘛，咁都唔曉
冇計，個天好公平，某方面叻某啲方面硬係蠢啲
喂，原來我真係幾「專業」o架

謝謝某個夜鬼
佢話我知原來首歌係Flyleaf嘅Cassie
聽下原裝版本同睇下個歌詞. . . 有點打冷震添
如果我冇get錯，首歌係講個真人真事
有人拎住支槍問Cassie" Do you believe in god?"
如果答yes，佢就會殺死Cassie
但Cassie都係答左"Yes"，最後佢都係死鬼左。
真係要好堅信自己死後會上堂，先敢答yes. . . 我欣賞佢嘅虔誠。

呢幾晚，好似總係會因為一個人而搞到好夜瞓咁. . .

我知道我唔乖，呢啲日子我唔應該五點先瞓覺。

所以又瞓到好晏，我的plan又褪遲晒褪遲晒

去了秀茂坪，第一次搭車上去囉竟然
遠望個秀茂坪商場，真係靚到傻左，抵佢攞獎

上左一樓. . . 大方攝影. . .
嘩﹗個姐姐真係幫我留起左最後一盒史迪仔即影即有菲林呀﹗
佢幫我擺開左擺左喺印影機上面冇擺喺貨架上﹗太好喇佢﹗
同埋呢，點解呢間分店兩個姐姐都咁後生，點解我樓下嗰間係老姐姐同阿老哥哥黎嘅 =P
又冇左七十五蚊喇. . .

我而家有兩盒史迪仔菲林

飛的去德福
我﹗星期二之前唔要再搭的士呀﹗
唔好畀我搭﹗
我要慳返啲錢呀﹗
要黎買史迪仔菲林. . .

我而家先知道張alpha卡係咁煩. . . (其實一直都覺得佢煩煩地o架啦)
因為佢，我喺德福行左好多轉. . . 你為我添左好多麻煩
哼，我下次會吸取經驗醒目啲o架喇

白色，短身，入面好多抓毛嘅外套
著住佢彷彿有個人緊緊咁攬住自己
oops~!
我左訂喇，佢係我o架喇﹗

又有冇人可以落我訂呢. . . 講定畀我知幾時會取貨，等我等得有目標啲嘛. . . =[

唔係幫人買魚蛋，我唔會記得原來自己今日淨係食左條snickers
呢個日子，真係冇乜胃口. . .

練嘢，好攰
呢個日子練嘢，特別攰
同埋，呢排，我背脊近住膊頭舊頭. . 彷彿舊患復發
真係好痛，成鬼日都勁痛，吹嘢吹耐一陣，勁痛
痛到欲哭
可惜無淚
可唔可以一世斷尾，有咩方法

好熟悉的Miniature Overture
好熟悉的melody，可惜係超唔熟悉的third
我唔知點解我真係數極都數唔到拍子. . . 都唔想用精神去數. . .
到底我之前係吹邊part o架. . .
出奇地，試完second再試first. . . . . . 下!? 乜我之前吹first o架咩!?
應該係當年唔知同邊個同part. . .
雖然份first係幾難，但，搵返份親切感
好，為左唔好出醜人前，我諗我真係會喺屋企拎支笛出黎練下嘢o架喇. . .

24號山頂表演. . . 哎呀，我嘅第一次咁就冇喇. . .
人地真係未去過山頂. . . 人地真係好想留畀個男仔o架嘛. . .

謝左。

呢個日子
真係特別覺得自己冇動力，冇希望，冇目標

其實，只係因為一個m痛jeh. . . . . . boo!

要搵一個叻過自己嘅男朋友
點先算係叻呢？
人有咁多方面嘅才能，你要佢邊樣叻過你呢？

總覺得那些大男人的男生好蠢
可能係，可能學識上、身份上、年齡上
女方係比男嘅優越(大啲老啲..)
但人地都未介意時，就唔好自卑啦
佢揀得你，就係睇到你值得佢倚靠嘅地方
其實，
學識、職位、身份等等都不及一個值得倚靠嘅胸膛呀

其實覺得有點唔舒服
想點呀
黑眼圈大就不嬲o架啦
平胸就不嬲o架啦
唔駛重覆又重覆囉
呢個日子咁樣畀人話真係特別忟
其實我都好想講. . . . . .
算啦，最後都冇講
每個人都總係有好有唔好o架啦
人地有胸我有腰，咁咪打個和囉，有咩好講jac。

好怕去對號入座
好嘢冇我份o架喇
衰嘢都係留返畀我啦。